УВЕР ЙОГЫН

Икымше йӧратымаш, пытартыш йӧратымаш…

Шукерте огыл Озаҥысе журналист-влакын пӧртыштышт режиссёр, сценарист, писатель да журналист Анатолий Омельчукын  «Николай Заболоцкий. Последняя любовь» документальный фильмжын презентацийже эртен. Тиде фильмым «Регион-Тюмень» телерадиокомпаний ямдылен.

Каласен кодыман, фильмым войзымашке шке надыржым историй науко кандидат, журналист Руслан Бушков пыштен. Тудо кызыт Озаҥыште ила да пашам ышта. Презентаций годым тудо Николай Заболоцкийын илыш корныжо да творчествыже нерген шуко оҥайым каласкален.

Презентаций поэтын возымо мутшылан «Очарована, околдована…» романс дене почылтын. Николай Заболоцкий Озаҥыште, Кизический слободаште  шочын. Руслан Бушков поэтын творчествыжым шукертсек шымла. Поэтын ты олаште еш дене илыме вич ияш пагытше нергенат шуко пала. Почеламутлаштыжат йоча пагытлан пӧлеклыме корныжо ятыр. Но уэш Озаҥыште тудо икымше гана Сибирьыш ссылкыш кайымыж годым, вес гана ссылке гыч пӧртылмыж го. Ачажым тушко пашаш колтеныт улмаш.

Фамилийже ончыч Заболотский лийын гын, варажым поэт тудым Заболоцкийлан вашталтен. Тудо моткоч сай кусарыше лийын. Палыдыме авторын «Слово о полку Игореве», Шота Руставелин «Витязь в тигровой шкуре» чапланыше произведений-влакым кусарен.  Николай Заболоцкийын лӱмжым таче Салмачеи посёлкышто ик урем нумалеш.

Фильмыште кугу верым поэтын икымше музыжо, Шернур ӱдыр Еня Барановалан ойырымо. Тичмаш лӱмжӧ – Евгения,  но лишыл еҥже-влак Еня маныныт. Ончыкылык поэт дене пырля тӱҥалтыш школышто тунемыныт. Вара  Николайым Уржумысо реальный училищыш, а Еням гимназийыш колтеныт.  Еня волостной писарьын полышкалышыжын ӱдыржо лийын. Канышлан мӧҥгыш толмеке, нуно угыч шуко жапым пырля эртареныт.

1919 ийыште нунын кылышт кӱрлын. Варажым Евгения Баранова Нижний Тагилыш логалын, туныктышылан ыштен, марлан лектын. Тидын нерген Николай Заболоцкий лагерь гыч пӧртылмекыже пален налын. А тушко тудым 1938 ийыште пуйто контрреволюционный пашажлан колтеныт улмаш. 1947 ий гыч Евгения пелашыже П.М.Комлев да ӱдырышт дене Волжскыш илаш кусненыт. Но Николайын пӱрмашыж нерген тудо эре пален налаш тыршен. Коктынат угыч вашлияш шоненыт, но…  1958 ий 14 октябрьыште Николай Заболоцкийын ӱмыржо кӱрылтын. Руслан Бушков поэт нерген шымлымашым эртарымыж годым Евгения Баранова дене вашлийыын. Тудын ойлымыжо почеш, ятыр почеламутшым поэт лач икымше музыжлан пӧлеклен.

С.Носова.

Снимкыште:  Николай Заболотский (Заболоцкий) да тудын музыжо Евгения Баранова: тыгай нуно икте-весын шарнымаштышт 1919 ийысе вашлиймаш деч ра кодыныт.

Фотом Р.Бушковын архивше гыч налме.

Опубликовать в Одноклассники

Добавить комментарий