УВЕР ЙОГЫН

Волгыдат лийын, шокшат ситен

Волгыдат лийын, шокшат ситен

Марий энергетик-влак шыже-теле жапысе пашаштым иктешленыт. Электросеть компаний тудым ўшанлын эртарен, палемден журналист-влак дене вашлиймаш годым Рўдӧ да Юл кундем МРСК «Мариэнерго» филиалын тўҥ инженержын эксплуатаций шотышто алмаштышыже Андей Христолюбов.

Эртыше теле республикысе энергетик-влакым кугунак тургыжландарен огыл. Йўштӧ пагыт вашеш мом ышташ кўлын, чыла шот дене шуктымо тидлан полшен. Тунам «Мариэнергон» специалистше-влак 110/35/10 киловольт куатан 8 подстанцийым, 6-10/0,4 киловольт куатан 261 трансформатор подстанцийым, тўрлӧ куатан 1300 утла километр электролинийым олмыктеныт.

Чодыран кундемыште илымынам  шотыш налын, электролиний шуйналтме пысманым эрыктымылан кугу тўткыш ойыралтын. Чылаже 350 утла гектар кумдыкым эрыктыме да 25 гектар нарылан пысманым шаралтыме. Чыла пашам график почеш да технический ден экологий нормылан келшышын шуктымо.

Йўштӧ пагытым сайын эртараш «Мариэнергошто» оперативный ден олмыктышо пашаеҥ-влак дене эреак тренировкым эртарымат йӧным ыштен. Тыгай годым МЧС подразделений, район ден ял администрацийла дене вияш кылым пеҥгыдемдыме нергенат мондымо огыл.

А пўртўс вий теле жапыште ик гана веле огыл чытышым да мастарлыкым терген. Эсогыл шошо кыдалне, апрель мучаште, кугу поран дене ӧрыктарен. Сутка жапыште ночко лум тылзаш нормо наре возын, мардеж секундышто 20 метр писылык дене пуэн. Электросеть компанийын пашаеҥже-влакын кўкшӧ профессионализмыштлан, пашам кўлын да чолган ыштымыштлан кӧра нелылыкым кораҥден сеҥыме. Олмыктышо бригаде-влак, кўрылтышым кычал муын, линийым писын тӧрленыт. Сандене эҥгекыш логалше районлаште электровийым кўчык жапыште пӧртылтымӧ.

Эртыше телым мучашлен, энергетик-влак кызытак шушаш телылан ямдылалташ тўҥалыныт.

— Энергетикыште каныш уке, — палемден, пресс-конференцийым мучашлышыла, Андрей Христолюбов. – Кажне сомыллан посна жапым палемдыме. Шошо ден кеҥеж – олмыктымо пашам шуктымо пагыт.

Тений марий энергетик-влакым икмыняр подстанцийыште олмыктымо паша вуча. Линий воктене пысманым эрыктыме да кумдаҥдыме сомыл тугак тўҥ лийын кодеш. Тидын кўлешлыкышым пўртўс ик гана веле огыл пеҥгыдемден ончыктен.

Компанийын сетьыштыже электровий йоммым иземдыме да тудым ситышын пуэн шогымо шотыштат шагал огыл ышталтеш. Мутлан, тудым тўрлӧ семын шолыштмым пален налме шотышто поян опытым погымо. Производство дене кылдалтше задачым шуктымо дене пырляк специалист-влакым теорий да практике велым ямдылымылан кугу тўткыш ойыралтеш.

С. Шалагин,

Ю.Исаков.

Опубликовать в Одноклассники