Кодшо кушкыжмын Советский районышто лийше корно туткареш кок еҥ колен.
Тиде азап Йошкар-Ола-Уржум кугорнын 38-ше меҥгыштыже лийын. Ончылгоч рашемдыме почеш, «ВАЗ-2110» автомашинан 26 ияш водительже, утыжым писын кудалшыжла, рульым кучен сеҥен огыл, Советский-Йошкар-Ола рейс дене ваштареш толшо «ПАЗ» пассажир автобусыш керылтын. Салонышто 23 еҥ кудалын. Чот керылтмылан кӧра легковой автомобильын ончыл ужашыже йӧршын шаланен. Водитель ден пеленже шинчыше 59 ияш пассажир тыгай кугу туткарыште илыше кодын кертын огытыл, аварий верешак коленыт.
Автобусышто лийше-влак коклаште сусыргышо-шамыч улыт. 12 пассажирлан да кум йочалан эмлыме учрежденийыште полышым пуаш пернен. Кумытшым больницыш пыштыме. Кызыт аварий лийме амал рашемдалтеш. Марий Эл Республикын правительствыже туркарым контрольыш налын.
А.АНДРЕЕВ.
(Марий Эл МВД-н пресс-службыжын фотожо.)
