УВЕР

«Пеледыш пайрем» иквереш чумырен

  «Пеледыш пайрем» — уло тӱня мучко  шарлыше марий калыкым ушышо, кажне гаяк марий еҥын ик эн йӧратыме пайремже. Тений тушко Марий Эл Республик вуйлатышын пашажым жаплан шуктышо Александр Евстифеев толын ыле.

Тудо Йошкар-Оласе Ленин площадьыште «Пеледыш пайремым» почо. Саламлыме мутшо-влак, поснак «тиде мемнан йӧратыме пайремна» манмыже да калык ончыко марий тӱран галстукым пижыктен лекмыже, еҥ-влаклан чотак келшыш, очыни. Вет тидын дене регион вуйлатышын пашажым жаплан шуктышо марий кундемыште илыше-влакым пагалымыжым ончыктыш.

Тылеч вара правительствын еҥже, моло дене пырля рӱдӧ каныме паркыш йолын (!) кайыш. Тушто Марий тӱвыра рӱдерын «Чон оҥгыр» ансамбльжын участницыже-влак Александр Александровичым сылне марий муро да тичмаш мелна кышыл дене вашлийыч. Мелнам тамлымеке, погынышо-влакым эше ик гана Пеледыш пайрем дене саламлыш, пайрем сайын эртыже манын тыланыш да икмыняр площадкым ончен савырныш. Республикысе район-влакын «кудо» конкурслан ямдылыме южо «кудывечышкышт» пурен, кидпашашт ден кочкыш-йӱышыштым ончен савырныш. Ик «кудо» гыч весыш кайымыж годым мемнан  палаткына воктеч эртымыж жапыште ӱдырна-влак тудлан «Марий Эл» газетнамат пӧлеклаш йӧным муыч. «Марий Эл» — республикыштына марий йылме дене лекше тӱҥ газет улмо нерген каласымекышт, тудо кидышкыже нале, тауштыш да газетыштыда мом возымо дене обязательно палыме лиям, мане.  

Умбакыже Александр Евстифеев Чарла Кремльыште лие. Тушто туризм да каныш «ПЕЛЕДЫШ Fest: Все краски отдыха!» икымше фестивальыш ушныш.

 

Чыла тидын нерген кумданрак возымо материалым шуматкече номерыште лудын кертыда.

Любовь Камалетдинова.

Опубликовать в Мой Мир
Опубликовать в Одноклассники

Добавить комментарий

Ваш e-mail не будет опубликован. Обязательные поля помечены *