Оҥай еҥ дене вашлиймаш
Мастарлыкше ӧрыктара
9 май вашеш Йошкар-Олаште илыше самырык рвезе Илья Белов графити йӧн дене вич пачашан пӧртын пырдыжыштыже Сеҥымаш кечылан пӧлеклалтше пеш сылне сӱретым ыштен. Тушто Совет армийын сухопутный войскажын, авиаций ден теҥыз флотын салтакше-влак ончыкталтыныт. Самырык сӱретче тудым 50 шагат жапыште ыштен. Оласе администраций тидлан разрешенийым пуэн. Вес поро еҥ, Роман Пахмутов, сӱретчылан чия, автовышке, оласе погынымашын депутатше Павел Лапшин окса дене полшеныт.
Сар темылан пӧлеклыме тудын сӱретшым Йошкар-Олаште икмыняр вере ужаш лиеш. Гагарин ден Панфилов урем-влак ушнымаште, Ленин лӱмеш тӱвыра полатын боксер-влакын школыш, «Вятич» спорт-барыш пурымаште…
Йолташыже-влак графитистым Илья Узор семын палат. Молан тудо лач сар тематикым пагала? Темыже лишыл. Кугезына-влакын чапыштым, подвигыштым мондыман огыл, манеш тудо. Кок кочажат сарыште лийыныт. Коктынат сусыр пӧртылыныт. Санденак вес олала гыч тудлан ты теме дене кылдалтше сӱретым ышташ йодыт гын, кумылын келша. Пытартыш паша кокла гыч сарын ветеранже-влакын госпитальыштын пырдыжыштыже сӱретым ончыкташ лиеш.
Илья куд ияшыже годымак сӱретлаш тӱҥалын. Вара ача-аваже тудым художественный школыш тунемаш пуэныт. Но тушто тунем шуктен огыл. Оласе вес самырык графитистын сӱретше-влакым ончен, эркын шкежат краскан балончикым налын ончаш кумылаҥын. Йошкар-Оласе художественный школым тунем лекше Саша Аржанов шке жапыштыже ик эн ончыч Йошкар-Олаште графити йӧн дене сӱретлен. Кызыт тудо Москваште ила да пашам ышта. Шкенжын графити школжо уло. Уло Россий мучко сӱретлаш кудалыштеш, персональный выставкыламат эртара.
Илья ончыч тошто, коден кайыме оралте пырдыжлаште сӱретлаш тӱҥалын. Тыгак эркын каен. Икымше гана 17 ияш годымжо заказ почеш сӱретлаш темленыт. Пытартыш жапыште компьютер графике стильым ойырен налын. Тӱҥ пашаже тидын дене кылдалтын. Икмыняр ий ончыч тудо Тулышто эртыше «Другое восприятие» конкурсышто икымше верым налын. Сӱретше Куликовский кредалмашлан пӧлеклалтын улмаш.
Такшым, графитин шуко направленийже уло. Южышт пырдыжым гына локтылыт гын, весышт, чынжымак, шке мастарлыкышт дене ӧрыктарат да кумылым нӧлтат, искусство произведенийым ыштат. Илья Беловын творчествыжым лач тыге аклаш лиеш, очыни.
С.Носова.
Снимкыште: Ильян пытартыш пашаже.
М.Скобелевын фотожо.
